Tit 3 | NdeIBE | STEP | Khumbuza abantu ukuba bazehlisele ngaphansi kwababusi, labaphathi, lokuba balalele, lokuba balungele ukwenza loba kuyini okuhle,

Titus 3

Ukwenza okuhle

1 Khumbuza abantu ukuba bazehlisele ngaphansi kwababusi, labaphathi, lokuba balalele, lokuba balungele ukwenza loba kuyini okuhle,

2 lokunganyeyi muntu, lokuba lokuthula kanye lozwelo, kanye lokubonakalisa ukuzithoba okuqotho ebantwini bonke.

3 Ngesinye isikhathi lathi sake saba yiziwula, singalaleli, sikhohliswa njalo sithunjwe yizinhlobo zonke zezinkanuko kanye lezinjabulo. saphila phakathi kwenzondo lomhawu, sizondwa njalo sizondana. 4 Kodwa kwathi umusa lothando lukaNkulunkulu uMsindisi wethu sekubonakele,

5 wasisindisa, hatshi ngenxa yezinto ezilungileyo esasizenzile, kodwa ngenxa yesihawu sakhe. Wasisindisa ngokugeziswa kokuzalwa kutsha kanye lokuvuselelwa nguMoya oNgcwele,

6 amthela kakhulu phezu kwethu ngoJesu Khristu uMsindisi wethu, 7 ukuze kuthi sesilungiswe ngumusa wakhe, sibe yindlalifa silethemba lokuphila okulaphakade. 8 Leli yilizwi eliqotho. Njalo ngithanda ukuba izinto lezi uzicokise, ukuze kuthi labo abathembele kuNkulunkulu bananzelele ukuzinikela ekwenzeni okuhle. Izinto lezi zinhle kakhulu njalo zilosizo ebantwini bonke.

9 Kodwa xwaya impikiswano yobuwula lezindaba zezinsendo kanye lemibango lengxabano mayelana lomthetho, ngoba lokhu akulasizo njalo kuyize. 10 Umuntu oxabanisayo mlaye kanye, uphinde umlaye okwesibili. Emva kwalokho mxwaye.

11 Ungaba leqiniso ukuthi umuntu onjalo uxhwalile njalo uyisoni; nguye ozilahlayo yena ngokwakhe.

Amazwi okucina

12 Ngingaze ngithumele u-Athema kumbe uThikhikhu kuwe, wohle uzame ngamandla akho wonke ukuza kimi eNikhopholi, ngoba sengizimisele ukuhlala khona ebusika. 13 Yenza konke ongakwenza ukuba usize uZena igqwetha kanye lo-Apholo ohambeni lwabo ubone ukuba balakho konke abakuswelayo. 14 Abantu bakithi kumele bafunde ukuzinikela ekwenzeni okuhle ukuze badlinzekele iziswelo zansuku zonke njalo bangaphili impilo engalethi lutho.

15 Bonke abalami bayakubingelela. Bingelela labo abasithandayo ekukholweni. Umusa kawube lani lonke.